जिल्हापरिषद सिंधुदुर्ग आणि माझी वसुंधरा 4.0 अंतर्गत करतोय ध्यास,

त्यास दिली भागीरथ ग्राम विकास प्रतिष्ठान संस्थेने साथ.

आता तुम्ही सर्वांनी द्या या उपक्रमास साथ,

सर्वांनी मिळून थांबवूया पर्यावरणाचा होणारा ऱ्हास… 

सर्वांना गणेशोत्सवाच्या हार्दिक शुभेच्छा!

या वर्षी म्हणजेच 2023 मध्ये गणेश चतुर्थी खूप लांब म्हणजेच सप्टेंबर महिन्याच्या 19 तारीख ला आली. सर्वच आतुरतेने वाट पाहत असणारा हा सण बघता बघता कधी जवळ आला समजलेच नाही. सर्व ठिकाणी लगबग सुरू झाल्याचे दिसून येते. गणेशोत्सव हा हिंदू धर्मियांचा एक सार्वजनिक आणि आवडता सण आहे. नवीन कॅलेंडर घरात आले रे आले की गणेशोत्सव कधी आहे याचीच सर्वांना आतुरता असते. या उत्सवामध्ये गणपतीची सेवा, पुजा केली जाते. हिंदू धर्मियांचे आराध्य दैवत असलेल्या विघ्नहर्त्या गणरायाचे भाद्रपद शुद्ध चतुर्थीस आगमन होते, व पुढील दहा दिवस मोठ्या उत्साहाने हा सण साजरा केला जातो. हिंदू धर्मिय गणेशोत्सव हा जल्लोषात साजरा करतात परंतु सध्याच्या बदलत्या युगा नुसार सर्वच ठिकाणी, हा उत्सव कमी आणि दिखावूपणा जास्त होत आहे, आणि याच गोष्टीमुळे पर्यावरणाकडे दुर्लक्ष होत असल्याचे दिसून येते. मीच का पर्यावरणाचा विचार करायचा? असे म्हणून सगळेजण हा विषय टाळत आहेत. पण जर प्रत्येकाने या गोष्टीचा गांभीर्याने विचार केला तर थोड्या प्रमाणात का होईना आपण प्रदूषण टाळू शकतो.

आपल्या गणेशाची मूर्ति सुंदर आणि अप्रतिम दिसावी असा प्रत्तेकचा विचार असतो. त्या साठी हल्ली अनेक स्पर्धा देखील भरवल्या जातात. त्यामुळे सर्वजण पर्यावरणाचा विचार न करता आपली गणेशमूर्ती प्लास्टर ऑफ पॅरिसच्या बनवून घेतात. प्लास्टर पॅरिस च्या गणेशमूर्ती नदीपात्रात किंवा समुद्रात विसर्जन केल्यावर विघटन होण्यासाठी कित्येक वर्ष लागतात. त्याच बरोबर सजावटीसाठी थर्माकोल चा वापर, घातक रासायनिक रंगांचा वापर करण्यात येतो यामुळे जलप्रदूषण होऊन मोठ्या प्रमाणावर पर्यावरणाची हानी होताना आपल्याला पहायला मिळते. त्यामुळेच जिल्हापरिषद सिंधुदुर्ग आणि माझी वसुंधरा 4.0 अंतर्गत हरित गणेशोत्सव उपक्रम राबविण्यात आला. ज्या मध्ये पर्यावरण पूरक गणेश मूर्ती बनविण्याचे प्रशिक्षण देण्यात आले. पाणी प्रदूषित करण्याऐवजी मातीच्या किंवा शाडूच्या मूर्तीचे पूजन करून कृत्रीम तलावात विसर्जन करणे ही काळाची गरज आहे.